Kombëtarja e futbollit U-21 mposhti sot Maltën me rezultatin 2-0 në takimin miqësor të zhvilluar në stadiumin “Selman Stërmasi”.
Pjesa e parë e lojës u dominua e gjitha nga skuadra kuqezi, e cila arriti të gjente 2 herë rrjetën me anë të Rubin Hebajt dhe mesfushorit të Shkëndijës së Tetovës, Imeri, i cili ktheu në gol penalltinë e fituar nga lojtari i Partizanit.
Në 45-minutshin e dytë, ritmi i lojës ra ndjeshëm, teksa të 2 trajnerët kryen zëvendësime të shumta, që ndikuan në mënyrë të drejtpërdrejtë tek loja. Vlen për t’u përmendur aktivizimi i mesfushorit Esat Mala, i cili tronditi traversën në pjesën e dytë.
Kombëtarja e Maltës provoi të shënonte gol në fundin e ndeshjes, por hasi rezistencën e portierit Dajsinani që ishte në një formë të mirë.