Protesta mbyllet për sot, për të rinisur nesër më fort, më e madhe, më e bashkuar! Nesër fillon rrëzimi

Ka zgjatur rreth 60 minuta protesta e banorëve të Unazës së Re para Bashkisë së Tiranës. Gjatë protestës ka patur momente tensioni, pasi banorët kanë shtyrë policët bashkiakë për të hyrë me forcë në Bashki por më pas janë tërhequr sërish pas ndërhyrjes së policisë.

Banorët shprehen të vendosur dhe kërkojnë dëmshpërblim me vlerën e tregut për banesat e tyre që do të prishen nga projekti i Unazës së Madhe.

Banorët kanë kërkuar takim me kryetarin apo përfaqësues dhe një përgjigje nga bashkia. Ata kanë kërkuar të dëmshpërblehen për banesat e tyre pasi kanë 20 vite që jetojnë aty dhe kanë hedhur mundin e gjithë jetës.

Edhe në protestën e djeshme ishin të pranishëm deputetët të Partisë Demokratike që kanë hedhur akuza në drejtim të kryeministrit dhe kryetarit të Bashkisë.

CILAT JANË KOMPANITË QË DO NDËRTOJNË UNAZËN E RE

Përfituesi i projektit të “Unazës së Re” është bashkimi i kompanive DH Albania dhe Biba X, por mbi bazën e dokumenteve, rezulton se të dyja kompanitë për historikun e tyre janë bërë objekt debati sa i përket pastërtisë së tenderit. Kompania DH Albania është krijuar në korrik të këtij viti, saktësisht një muaj e gjysmë para se të hapej gara për tenderin.

DH Albania është kompani regjistruar në Shqipëri më 18 korrik 2018 si degë e një kompanie të huaj Dunwel Haberman. Kompania mëmë e saj është kompani offshore, me pronarë të panjohur, e riregjistruar në Delaware të Shteteve të Bashkuara të Amerikës, vend i cili njihet si parajsë fiskale. Në Qendrën Kombëtare të Biznesit, si përfaqësuese ligjore e kompanisë mëmë është regjistruar Nesha Lynn Kumar, shtetase dhe banore e Ishujt Sejshell.

Kompania Biba-X, është regjistruar në Kavajë në vitin 2002, me objekt prodhim të materialeve të ndërtimit, kryesisht prodhim dhe tregtim inertesh. Më 15 tetor 2018, ortaku i vetëm Barush Biba ka ndryshuar objektin e kompanisë duke shtuar objektin “ndërtim rrugësh, ndërtime civile, rikonstruksion godinash fasadash”.

Kjo kompani ka qene vazhdimisht nën sekuestro për fatura të pashlyera ndaj kontraktorëve të ndryshëm. Gjithashtu mësohet se në shkelje të ligjit, Kompania Biba-X ka qenë nën sekuestro edhe gjatë kohës që ka konkurruar për tenderin e rrugës.