Vendimi i drejtuesve të Arsimit për mbylljen e disa shkollave si rezultat i mungesës së nxënësve, për deputetin demokrat Luçiano Boçi është pasojë e keqmenaxhimit të MAS.
I ftuar në Ora News, anëtari i Komisionit të Edukimit dhe Medias, thotë se Ministria është kapur gafil edhe pse ishte paralajmëruar prej kohësh nga opozita.
Boçi: Nuk është reformë, por pasojë e keqmenaxhimit arsimor në Shqipëri. Paralajmërimi i fortë i opozitës për braktisjen e arsimit nga 133 mijë nxënës po jep pasojat e tij.Pasojat janë suksesive jo vetëm në mbylljen e institucioneve arsimore por dhe mënyrën si do të procedohet me mësuesit që dalin të tepërt brenda sistemit arsimor.Ministria nuk ka ndërtuar një strategji për gjendjen në të cilën është kapur gafil, kemi një Ministri që është me axhendë dite dhe krejtësisht e paaftë.
Sipas Boçit, shtimi i klasave kolektive përgjatë këtyre viteve, duke filluar nga 2013, ka qenë galopant.
Boçi: Ajo që kemi kërkuar është hartimi i një politike të saktë për eleminimin e klasave kolektive dhe kjo vinte si masë e parë me hartën e re të shkollave në gjithë territorin, gjë që nuk ndodhi.Mbyllja e njëpasnjëshme e shkollave ka kapur të papërgatitur komunitetet dhe nxënësit.Nuk kemi asnjë masë dytësore paraprake për transferimin e nxënësve në shkollat më të afërta, gjithçka i është lënë rastësisë.
E ndërsa MAS ka premtuar garantimin e transportit, Boçi është skeptik sepse sipas tij Ministria nuk ka planifikuar buxhet për diçka të tillë.
Boçi: Garantimi i transportit është zbatim i një detyrimi ligjor i vendosur që nga PD bën ligjin e sistemit parauniversitar. Ministria sot nuk paguan as transportin e mësuesve por ka defiçenca dhe në pagesën e transportit të fëmijëve. Nëse ka një masë të tillë, parashikimi më i vogël që duhet të bënte Ministrja është parashikimi buxhetor.
Po cila është zgjidhja sipas demokratëve?
Boçi: Duhet të ishte parashikimi i asaj çfarë po ndodh dhe ndërtimi i një infrastrukture të posaçme për sistemin arsimor duke ndërtuar shkolla në qendra të komunave apo qendrave të banuara me qëllim që mbyllja e shkollave në vazhdimësi të mos ishte një pasojë e papritur për nxënësit.
Discussion about this post