Kandidati për president i ekstremit të djathtë në Brazil, Jair Bolsonaro, është goditur me thikë nga një person gjatë një tubimi elektoral.
Politikani i ekstremit të djathtë u sulmua në një tubim gjatë fushatës në Minas Gerais. Mjekët thonë se ai pësoi plagë të rënda, dhe u dërgua në spital, ku iu nënshtrua një ndërhyrjeje kirurgjikale
Jair Bolsonaro 63 vjeç kryeson sondazhet me 22 % të mbështetjes popullore për zgjedhjet e 7 Tetorit. Kandidati i Partisë Socialiste Liberale ka shprehur hapur pikëpamjet e tij raciste dhe kundër homoseksualëve.
Turma e mbështetësve ndaloi agresorin Adelio Obispo de Oliveira 40 vjeç, të cilin ia dorëzuan policisë. Arsyet që e shtynë atë të ndërmerrte sulmin nuk dihen, por dyshohet se ai kishte çrregullime mendore.