Gjesti prekës i polices, ushqen foshnjën me gji

0

Një efektive e policisë i dha gji një fëmije të kequshqyer, i cili u soll në spitalin ku ajo ishte në detyrë. Celeste Ayala po punonte në spitalin e fëmijëve të Sor Maria Ludovica në Buenos Aires, kur foshnja u soll duke qarë në mënyrë të dëshpëruar.

Policja i kërkoi leje mjekëve për ta mbajtur dhe ushqyer foshnjën sepse po e shihte që ishte i uritur dhe se stafi i spitalit ishte i mbingarkuar me punë. Mjekët e lejuan dhe sapo fëmija filloi të ushqehej pushoi së qari menjëherë.

Ayla u shpreh se, “E vura re që ishte i uritur, pasi po vendoste duart në gojë. Ndaj vendosa të kërkoja leje për ta përqafuar dhe ushqyer.  Ishte një moment shumë i trishtë. Shoqëria duhet të jetë më sensitive për çështjet që prekin fëmijët. Nuk duhet të vijojë të ndodhë”.

Një mik i polices, Marcos Heredia tha se stafi i spitalit e cilësoi foshnjën “të pistë”, por kjo nuk e shqetësoi Aylan. Ai e fotografoi duke i dhënë gji dhe e shpërndau në rrjetet sociale.

Ai u shpreh se, “Doja ta bëja publik gjestin e saj të mrekullishëm të dashurisë që bëri për një fëmijë që as nuk e njihte. Për këtë fëmijë që nuk hezitoi të sillej si një nënë. Nuk i interesoi që ishte pis, ashtu siç e quajti stafi i spitalit. Bravo mike!”

Kjo fotografi ka marrë më shumë se 68000 pëlqime, 300 komente dhe u shpërnda 94000 herë nga persona të cilët admiruan veprimin e saj kundrejt një fëmije të panjohur dhe “të pistë”.

Sipas mediave lokale, foshnja ishte më i vogli i gjashtë fëmijëve të një nëne beqare, e cila ndodhet në një situatë të vështirë ekonomike.

Brigada e zjarrit, ku Ayla punon si vullnetare gjatë kohës së lirë, shpërndau fotografinë e saj duke thënë se, “Sjellje të tilla na mbushin me krenari dhe na detyrojnë të dyfishojmë përpjekjet, punën dhe solidaritetin me komunitetin tonë”.

Lini nje pergjigje