Nëna e dy fëmijëve, 7 dhe 14 vjeç, Violeta Donaj, në rrëfimin e saj para Policisë për vrasjen e bashkëshortit, thotë se gjithçka ka ardhur nga dhuna dhe vesi i tij për të luajtur kumar.
35-vjeçarja, e pyetur nga Policia se ku e ka gjetur armën, ka deklaruar se e ka marrë atë te makina që burrë e grua përdorin për nevojat e familjes, por pa përcaktuar nëse arma i përkiste vetë viktimës.
Nga ana tjetër, familja e Kujtim Donajt në Mirditë ka hapur dyert e mortit. Gazeta “Panorama” ishte në shtëpinë e familjes Donaj, në qytetin e Rrëshenit, gjatë ceremonisë për përcjelljen për në banesën e fundit të 42-vjeçarit. Kujtim Donaj është përcjellë për në banesën e fundit rreth orës 13:00 të së hënës.
Në ceremoninë mortore kanë qenë të pranishëm dhe dy fëmijët e tij të mitur, ndërsa kanë munguar familjaret e gruas, të cilët nuk janë pranuar të jenë në ceremoni nga familja e viktimës. Familjarët e tij nuk pranojnë të flasin për mediat në lidhje me krimin e rëndë, duke e kaluar atë çfarë ka ndodhur në heshtje të plotë. Por, në biseda me të afërm të tyre, mësohet se ajo çfarë kërkon familja Donaj ka të bëjë me personin që i dha pistoletën nuses së tyre.
Ata ia kanë kërkuar këtë Policisë, por edhe po e kërkojnë privatisht për ta zbuluar se si ka përfunduar pistoleta në duart e 35- vjeçares. Nga hetimet e deritanishme rezulton se mes çiftit ka pasur probleme dhe një javë më parë është diskutuar edhe divorci. Nga pyetja e 35-vjeçares së arrestuar, Policia e ka përforcuar idenë se konflikti ka ndodhur për shkak të marrëdhënieve të tensionuara së çiftit. Gruaja mësohet t’u ketë thënë hetuesve se bashkëshorti i saj konsumonte alkool, ishte i dhunshëm dhe shpenzonte shumë para në bixhoz. Violeta Donaj ka shprehur pendesë për krimin e kryer, ndërsa shumicën e kohës në ambientet e paraburgimit ndodhet në gjendje të tronditur.
Për këtë shkak, ajo do të merret sërish në pyetje nga hetuesit. Sipas të dhënave, dy ditë para ngjarjes, Violeta Donaj kishte marrë djalin e saj të mitur dhe ishte larguar nga banesa e bashkëshortit, duke shkuar te familja e prindërve të saj. Mbi Violeta Donajn tashmë rëndon akuza e “armëmbajtjes pa leje” dhe “vrasjen me paramendim”.
