Emigranti i sapokthyer nga Anglia vret me armë zjarri nënën dhe babanë e tij. Ngjarja e rëndë ndodhi dje në orët e mesditës në zonën e njohur si Llixhat në Peshkopi. Sipas Policisë, 26- vjeçari Qemal Sela ka qëlluar me armë automatike prindërit e tij, shtetasit Flamur Sela, 55 vjeç, dhe Zeqimete Sela, 50 vjeçe, të cilët gjetën vdekjen e menjëhershme.
Nisur nga gjendja e paraqitur pas krimit nga ana e të riut, ka dyshime se ai ka probleme me shëndetin mendor. Burime nga grupi i hetimit bënë të ditur se, bazuar edhe në dëshminë e të afërmve të tij, dyshohet se ai ka pësuar tronditje të fortë psikologjike pasi është kapur nga Policia në Angli. Ai jetonte dhe punonte prej rreth 8 vitesh në këtë shtet, por mungesa e dokumenteve e ka penalizuar atë për ta kthyer deportiv.
Qemal Sela, djali qe vrau nenen dhe babane
Qemal Sela, djali qe vrau nenen dhe babane
NGJARJA Familja Sela jetonte në katin e parë të një godine katërkatëshe në lagjen “Llixha” në Peshkopi. Dje rreth orës 12:30, banorët, por edhe disa efektivë që janë ndodhur afër, kanë dëgjuar të shtënat e armës. Dyshohet se në familjen Sela ka pasur një sherr të mëparshëm në lidhje me godinën ku ata edhe banonin. Sipas të dhënave, familja jetonte në një pjesë të katit të parë, ndërsa pjesën tjetër bashkëshortët Sela e menaxhonin si hotel për qytetarët që vinin për t’u kuruar në llixhat e Peshkopisë. Ata trajtonin afro 70 pushues në muaj në hotelin e tyre.
Dyshimet e para ishin se ata u grindën për hotelin që shërbente për llixha. Policia bëri të ditur dyshimet se një natë para krimit brenda familjes Qemal Sela ka debatuar me prindërit, vëllain e motrën në lidhje me pronësinë e hotelit.
Emigranti u ka kërkuar llogari familjarëve të tij për paratë e dërguara gjatë tetë viteve, duke dyshuar se ato nuk janë menaxhuar si duhet ose mbahen të fshehura nga prindërit. Disa banorë janë shprehur në Polici se nata në familjen Sela nuk ka qenë aspak e qetë, por e tensionuar, e zhurmshme dhe e shoqëruar me sherre. Një tjetër pistë, e cila konsiderohet më e besueshme për hetimorët, është se i riu e ka kryer krimin e rëndë në kushtet e një tronditjeje të fortë psikike. Ai nuk e ka përballuar dot shkëputjen nga Anglia, ku kishte shkuar tetë vite më parë dhe punonte atje pa dokumente.
Në kushtet e kësaj tronditjeje, dyshohet se Sela nuk ka kursyer as prindërit e tij, me të cilët ka pasur edhe debat. Sakaq, edhe burime zyrtare pranë Drejtorisë së Policisë Peshkopi pohojnë se gjendja e shëndetit mendor të Qemal Selës nuk është e mirë.
Specialistët dhe drejtuesit dyshojnë se ai e ka kryer krimin e dyfishtë në kushtet e depresionit. Po sipas Policisë, i arrestuari për krimin e rëndë nuk ka dhënë sqarime rreth motiveve të vrasjes së prindërve.
“Na tha se e kanë burgosur në Angli, se ia kanë futur kokën në kazan me ujë, se e kanë rrahur, madje se nuk ka as prindër”, bënë të ditur burime nga grupi i hetimit, teksa konfirmuan se ka dyshime të forta në lidhje me shëndetin mendor të të riut.
FAMILJARET
Autori i krimit të rëndë është arrestuar vetëm disa momente më pas nga efektivë të Policisë, të cilët janë ndodhur afër vendit të ngjarjes. Ata e kanë parë me armë në dorë dhe në një kohë mjaft të shpejtë negocimi e kanë bindur të hidhte armën në tokë dhe të vetëdorëzohej. Më pas janë marrë në pyetje edhe motra dhe vëllai i tij, të cilët kanë deklaruar se ishin përpjekur ta çonin në spital pas depërtimit, por nuk kishin arritur ta bindnin. Ata janë shprehur se Qemali ka mbërritur pranë familjes dy ditë më parë.
“Nuk e dinim se do të vinte. Patëm biseduar me telefon dhe nuk na pati thënë se do të kthehej. Nuk e dinim se nuk ishte mirë me shëndet. Fillimisht u gëzuam që u kthye, por kur e pamë se nuk ishte mirë, u mërzitëm shumë. Tentuam ta çonim për vizitë në spital, por ai nuk pranoi”, kanë rrëfyer ata për hetimorët.
Blutë do t’i marrin në pyetje sërish më vonë për të qartësuar edhe një herë momentin e krimit, pasi motra dhe vëllai i të arrestuarit nuk kanë qenë në gjendje të japin detaje të hollësishme se çka ndodhur konkretisht në banesën e tyre. Mësohet se 26-vjeçari gjatë qëndrimit në Angli është kuruar, por nuk dihet qartësisht për çfarë.
