QSUT tender 1 mln USD për hemodializën…edhe pse është me koncesion!

0
165

Dy vite më parë, qeveria akordoi plot 86 milionë USD për një koncesion, që do të mundësonte shërbimin e hemodializës në të gjithë vendin. Koncesioni u fitua nga një kompani e dyshimtë, e cila nuk kishte asnjë eksperiencë në këtë fushë, përveç pronësisë së një Bar-Kafe.

Megjithatë, shteti vijon të paguajë para duke bërë tenderë publik për hemodializën, krahas miliona eurove që ka dhënë për koncesionin.

Tpz.al ka mësuar se QSUT ka hapur dy tenderë për hemodializën, me vlerë 1 milionë USD. Institucioni i drejtuar nga Enkelejd Hoti kërkon të blejë barna dhe aksesorë për hemodializën. “Kërkohet të blihet solucion dhe aksesorë dialize për makinat Fresenius etj” thuhet në dokumentet e tenderit. Ndërkohë, fondi për këtë është 530 milionë lekë.

Tenderi i dytë është për “blerje barna për hemodializën në QSUT”, fondi për këtë tender është 500 milionë lekë. Kohëzgjatja e kontratës ose afati kohor për ekzekutimin është deri më 25 dhjetor 2018.

Por nëse barnat blihen nga buxheti i shtetit dhe shërbimi ofrohet po me fondet e shtetit, natyrshëm lind pyetja se çfarë funksioni ka koncesionari i cili ka përfituar plot 86 milionë USD.

Megjithë këto shuma të tenderuara, në dokumentet e koncesionit thuhet se procesi i dializës për të sëmurët me probleme në veshka mbulohet prej vitesh 100 % nga Fondi i Sigurimit të Detyrueshëm të Kujdesit Shëndetësor, për rreth 900 pacientë që përfitojnë nga ky shërbim.

Mësohet se operatori ekonomik do të mbulonte ndërtimin e qendrave, pajisjen me aparaturat e dializës, bërjen funksionale të qendrave dhe pajisjen me personel mjekësor dhe staf mbështetës. Hemodializa është një proces të cilit i nënshtrohen personat që vuajnë nga mosfunksionimi i veshkave dhe konsiston në filtrimin e gjakut të pacientëve me pajisje jashtë trupit për të zëvendësuar veshkat që nuk funksionojnë.

Koncesionet në shëndetësi janë një gropë e madhe në buxhetin e shtetit. Deri më tani, qeveria ka dhënë mbi 350 milionë euro koncesione për check-up, hemodializën, laboratorët privatë dhe sterilizimin. Koncesioni i hemodializës me vlerë 86 milionë dollarë u fitua nga Evita Shpk, një kompani me kapital 30 milionë lekë. Sipas BIRN, në nëntor 2016, 72.5 për qind e aksioneve të Evita Shpk iu shit përkundrejt një çmimi prej vetëm 160 mijë eurosh një kompanie guackë të quajtur ARIMO B.V. Kjo e fundit është e regjistruar në Hollandë, një vend që konsiderohet si parajsë fiskale pasi lejon kompanitë të regjistrohen aty me një administrator fasadë dhe me pronësi të fshehur./TPZ.AL/E.H./

Tenderi i parë:

Tenderi i dytë:

Web Agency, Digital Agency, Web Development Agency

LEAVE A REPLY

Please enter your comment!
Please enter your name here