Policia e Shkodrës ka dhënë njoftimin e parë zyrtar në lidhje me sulmin ndaj trajnerit të skuadrës së futbollit të Vllaznisë, Ernest Gjoka.
Sipas policisë, rreth orës 17:00, salla operative ka marrë një njoftim se afër portës hyrëse të një fushe sportive, një person i është afruar trajnerit të Vllaznisë. Ernest Gjoka ka qenë në shoqërimin e kapitenit Gilman Lika. Ai është sulmuar nga autori i cili e ka goditur me grusht.
Trajneri i Shkodrës është shmangur duke kundërvepruar ndaj sulmuesit dhe në ato momente ka rënë në tokë.
Pas kësaj, agresori u largua me vrap, ku në ikje e sipër është vënë re në dorën e tij një thikë.
Policia thotë se po punohet për kapjen e autorit.