Eduart Halimi, deputeti i PD-së, bëri të ditur sot dorëzimin e mandatit të ligjvënësit. Halimi kryesonte listën e kandidatëve për deputetë të PD-së në Qarkun e Beratit dhe pas tij në listë renditet, Astrit Veliaj. Referuar ligjit zgjedhor, Veliaj do të zëvendësojë Halimin si deputet i PD-së, duke u rikthyer në Kuvend, pas një shkëputjeje prej disa muajsh.
Pritet që zyrtarizimi të bëhet nga Komisioni Qendror i Zgjedhjeve, i cili ka tagrin t’i përcjellë Kuvendit vendimin për zëvendësimin e deputetit Halimi, që tashmë ka dorëzuar mandatin.
“Kam dorëzuar mandatin e deputetit pasi nga nesër i përkushtohem një projekti të së drejtës ndërkombëtare private në një netëork në Ballkan, projekt që është afatgjatë dhe kërkon që vendimin ta marr sot.
Kam qënë një njeri me fat në këto vite sepse kam pasur në krah bashkëpuntorë të shkëlqyer, të përkushtuar e të ndershëm me kontributin e te cilëve arrita të lija gjurmë, por mbi të gjitha që kam dalë faqebardhë nga të gjithë detyrat që kam pasur. Me punën e tyre ata i hoqën mundësinë kundërshtarëve politikë të hidhnin ndaj meje dhe atyre, baltën e kudogjendur në politikë. Ndaj dua ti falenderoj ata të gjithë sot publikisht.
Dua të falenderoj Sali Berishën, që më dha mundësinë të kontriboj ne jetën politike të vendit në këto vite.
Falenderoj Lulzim Bashën, për besimin në detyrat politike prej 2013, për bashkëpunimin e shkëlqyer në këto vite dhe për mirëkuptimin në çdo vendim prej ditës së parë e deri më sot”, tha Halimi në një deklaratë të bërë publike në rrjetin social.
