Pengu i mjeshtrit Rexhep Çeliku, flet valltarja Liljana Cingu

0

Pengu më i madh i tij ishte që “vallja të mos të ndalet, të vazhdojë; dhe Shqipëria të jetë një shqiponjë ashtu siç ne e meritojmë”, tha Liljana Cingu, partnerja e përhershme e Rexhep Çelikut në performancat e tyre në skenë. Teksa mbahen homazhet në nderim të mjeshtrit të madh të valles shqiptare,  i cili u nda nga jeta për shkak të një sëmundje të rëndë,  Liljana Cingu tregon emocionet kur atij iu dha dekorata “Nderi i Kombit”.

Kur u nderuam unë dhe Rexhepi është me të vërtetë një nder për artistët. Unë e dija se Rexhepi me forcat e veta do ta merrte këtë nderim. Por ai iku, ka fluturuar lart, krenar, ashtu si me krenari në skenat brenda dhe jashtë vendit ka promovuar vlerat shqiptare. Ai e meritonte atë nderim.

Rexhepi ishte një histori për skenën tonë. Ai me të vërtetë ishte legjenda e valles shqiptare, një shqiponjë që fluturonte në skenë, në publik, kudo ai shkelte. Edhe gurët e sokakut sot po qajnë për Rexhepin. Por unë them: Rexhep të kam gjithmonë në krah dhe do të kërcejmë vallen e shqiptarëve. Unë e konsideroja Rexhepin si vëlla”, u shpreh ajo.

Mjeshtri Çeliku vuante nga një sëmundje, prej një kohe të gjatë. Jo më larg se dy ditë më parë, ai u vlerësua me dekoratën “Nderi i Kombit” nga Presidenti, Ilir Meta.

Lini nje pergjigje