Por nëse i referohemi nenit 15 të ligjit, në pikët 3 të tij thuhet: Organizatat jofitimprurëse të autorizuara për dhënien e ndihmës juridike parësore përfitojnë financime nga buxheti i shtetit, pas një procesi konkurrues dhe transparent përzgjedhjeje..
Pra OJF, të cilat nga vetë emërtimi që kanë janë jofitimprurëse marrin para nga buxheti i shtetit për të ofruar shërbime.
Bëhet fjalë për të njëjtat organizata jo fitimprurëse apo shoqërinë civile, e cila prej disa muajsh bllokon ngritjen e Këshillit të Lartë të Prokurorisë, duke shkaktuar krizën në zgjedhjen e Kryeprokurorit. Pikërisht për shkak se shoqëria civile nuk depozitoi kandidaturat për ngritjen e KLP-së, u krijua ngërçi, që çoi në nisjen e proçedurës për zgjedhjen e një Prokurori të Përgjithshëm të përkohshëm, për të cilin opozita ka thënë se po zgjidhet me një proçedurë anti-kushtetuese.
Në të njëjtin nen, thuhet se proçedura, rregullat e përzgjedhjes së organizatave jofitimprurëse të autorizuara, që përfitojnë financime nga buxheti i shtetit dhe mënyra e financimit të tyre përcaktohen me vendim të Këshillit të Ministrave
Në vijim neni 15, thotë se Organizatat jofitimprurëse japin shërbime të ndihmës juridike parësore në përputhje me autorizimin e miratuar nga Ministri i Drejtësisë. Procedurat dhe dokumentacioni për autorizimin e tyre përcaktohen me vendim të Këshillit të Ministrave.
Organizatat jofitimprurëse që autorizohen për dhënien e shërbimeve të ndihmës juridike parësore duhet të përmbushin këto kritere:
a) të jenë të regjistruara në përputhje me legjislacionin në fuqi për organizatat jofitimprurëse;
b) të kenë si objekt të veprimtarisë së tyre të parashikuar në statutin e organizatës ofrimin e shërbimeve të ndihmës juridike;
c) të kenë shlyer detyrimet tatimore në përputhje me legjislacionin në fuqi;
ç) të kenë përvojë në ofrimin e ndihmës juridike;
d) të mos jenë në proces falimentimi dhe/ose likuidimi;
dh) anëtarët e organit më të lartë vendimmarrës dhe të organit ekzekutiv të organizatës jofitimprurëse të mos jenë dënuar me vendim gjyqësor të formës së prerë për kryerjen e një vepre penale me dashje dhe që do të cenonte besimin e publikut dhe ofrimin e përshtatshëm të ndihmës juridike.