FMN nxjerr bllof statistikat zyrtare të ministrisë së Financave

0

 

Fondi Monetar Ndërkombëtar, në një raport për zhvillimet rajonale, publikoi të dhënat për ecurinë e stokut të borxhit publik të Shqipërisë, të cilat nuk korrespondojnë me të dhënat zyrtare të qeverisë shqiptare. FMN raportoi se borxhi publik i vendit tonë arriti në 72.7% të PBB-së në fund të vitit 2016, teksa për të njëjtën periudhë, qeveria shqiptare ka raportuar se stoku i detyrimeve është 71.01% e PBB-së. Diferenca në 1.6 pikë përqindje në raport me PBB në vlera neto i takon një shume prej më shumë se 160 milionë eurosh. Burimet nga financat sqarojnë se institucionet financiare ndërkombëtare kanë përfshirë në stokun e detyrimeve të pushtetit lokal (rreth 9.6 miliardë lekë) shumë kjo që u zbulua gjatë një procesi auditi në njësitë e reja të pushtetit vendor.

Duket se qeveria shqiptare e ka raportuar treguesin e borxhit të vitit 2016 pa përfshirë këto detyrime, të cilat sipas planit të qeveris do të shlyhen nga buxhetet e bashkive gjatë dy viteve në vazhdim.

Borxhi publik prej katër vitesh ka kaluar kufirin që sugjerohet për vendet në zhvillim (60% e PBB), teksa detyrimet e krijuara rishtazi rrezikojnë që shifra, në vend që të ulet, të fryhet edhe më tej në vitet në vijim. Në fund të vitit 2016, entet publike numërojnë 230 milionë euro detyrime, sipas statistikave zyrtare, nga të cilat 58 milionë euro nga vendimet e gjykatave të brendshme, 58 mln euro të tjera fatura të papaguara ndaj OSHEE-së, 20 milionë euro fatura të papaguara ndaj punimeve në rrugë, 65 milionë euro borxhe të bashkive, etj., dhe 24 milionë euro TVSH e parimbursuar ndaj bizneseve.

Qeveria shqiptare e ka krijuar borxhin i ri, i cili nuk është kontabilizuar në treguesin zyrtar të borxhit, edhe pse ishte nën një monitorim të rreptë të Fondit Monetar Ndërkombëtar.

Marrëveshja e fundit e FMN-së me qeverinë shqiptare që përfundoi në fund të shkurtit të këtij viti, pati në fokus shlyerjen e të gjitha faturave të ish-qeverisë “Berisha”. Në shërbim të këtij qëllimi, FMN shoqëroi marrëveshjen me një mbështetje buxhetore prej 300 milionë eurosh. Mirëpo edhe pse qeveria shqiptare është angazhuar fort të mos mbartë fatura, nuk ka mundur të parandalojë krijimin e tyre.

Projektet kapriçioze të kryeministrit hedhin qindra miliona euro nëpër fasada

 

Fokusimi i investimeve publike në përmirësimin e infrastrukturës dhe imazhit në qendrat e qyteteve duket se ka kushtuar njësoj me ndërtimin e autostradës së re Tiranë – Elbasan. Sipas të dhënave nga Ministria e Çështjeve Vendore, gjatë viteve 2015-2016, janë investuar 39 miliardë lekë (285 milionë euro) në infrastrukturën vendore dhe rajonale, një pjesë e tyre nga Fondi i Zhvillimit të Rajoneve. Sipas të dhënave zyrtare, këto fonde janë përdorur për investime në rrugë dhe rikonstruksione të autostradave, sisteme të ujësjellës-kanalizimeve, parqe publike dhe ndërhyrje të tjera.

Pjesë e këtyre investimeve kanë qenë projekti “Lungo mare” në Vlorë. Disa nga objektet e financuara janë: Hyrjet e Tiranës nga Durrësi dhe Elbasani, Sistemimi i 2 shesheve në Tiranë, Unaza e Divjakës, Rruga Transballkanike në Vlorë, mbushja me rërë e plazhit Vlorë, rruga e Dajtit, Sheshi i Kukësit, Shëtitorja Himarë, etj. Punimet kanë përfunduar në 37 objekte dhe në fazën e zbatimit janë 2 objekte. Punimet në të gjitha objektet parashikohen të përfundojnë në maj 2017, dukshëm për të dhënë mundësinë e prerjes së shiritave para zgjedhjeve.

Lini nje pergjigje