Përveç cilësisë së ulët të ushqimeve është bërë një problem shumë i madh në Shqipëri. Një ndër problemet kryesore është edhe tregtia e ushqimeve në fast fond-e. Alarmi për cilësinë e ulët është trajtuar me mijëra herë në media dhe jo vetëm, por përsëri ky problem është shumë i përhapur në Shqipëri. Në fast fond problemi më i shpeshtë është riciklimi i mishit dhe mbajtja e vajit të pandryshuar për disa ditë me radhë.
Në shumë prej këtyre bizneseve, punonjëset kanë deklaruar se mishi që u tepron në darkë e fusin në frigorifer dhe e vendosin sërish në mëngjes ta ngrohin e më pas t’ua shërbejnë klientëve. Njëra prej tyre tha se mishi reziston edhe 3-4 ditë. “E fut në frigorifer dhe nuk e gjen asgjë, nuk mban erë fare”, thotë punonjësja. Përveç mishit problemi tjetër është edhe për vajin, sesa kohë mund të mbahet pa u ndërruar dhe çfarë lloji përdoretnë shumë prej bizneseve edhe pse nuk pranohet mësohet se përdoret vaj palme.
Ka punonjës që thonë se s’ka nevojë të ndërrohet fare derisa të mbarohet, thjesht duhet t’i hedhësh sipër sasi shtesë. Siç dihet dhe nga ekspertët, të cilët kanë kryer studime të ndryshme, mishi i ricikluar dhe vaji i përdorur disa herë i palmës janë të rrezikshëm për shëndetin nëse nuk përdoren në mënyrën e duhur.
Mishi është produkt blegtoral që ka rrezikshmëri të lartë për organizmin nëse mbahet në temperaturë të lartë për një kohë të gjatë, pastaj ftohet dhe sërish mbahet në temperaturë të lartë. Në këtë mënyrë krijohen kushtet për rritjen e mikroorganizmave, që janë të dëmshëm për shëndetin. Kurse vaji i palmës, sipas studimeve të shumta, bën keq për zemrën sidomos kur përdoret shpesh.
Ky vaj përdoret më së shumti nga industritë, sepse kushton më lirë se vajrat e tjerë. Por përdorimi i të njëjtit vaj disa herë sjellë një numër përbërësish që quhen “radikalë të lirë” dhe janë kancerogjenë. Gjithsesi, duket se këto të dhëna për rrezikshmërinë e këtyre produkteve ndaj shëndetit nuk i ka shqetësuar pronarët e këtyre fast food-eve, të cilët vazhdojnë të ushtrojnë aktivitetin e tyre të pa shqetësuar nga autoritetet përkatëse.
Discussion about this post