Një person në Vlorë ka denoncuar në polici se ka kaluar momente frike, pasi pesë persona i kanë dalë përpara makinës së tij, e kanë ndalur dhe e kanë goditur.
44-vjeçari D.D., banues në lagjen “24 Maji”, ka bërë kallëzim në polici dje duke pretenduar se në parcelat bujqësore të fshatit Kropisht, në vendin e quajtur “Lëmenj”, duke drejtuar automjetin e tij i kanë dalë përpara pesë persona të prezantuar si punonjës policie, pa shenja dalluese.
Ai ka thënë se i kanë kontrolluar automjetin nëse transportonte bimë narkotike dhe më pas e kanë lejuar të largohet. Gjithashtu, 44-vjeçari ka bërë kallëzim se këta persona e kanë goditur edhe me grusht. Policia thotë se në trupin e tij nuk u vunë re shenja dhune, dhe se lidhur me këtë çështje ka nisur hetim. Pas denoncimit të D.D., materialet i’u referuan Prokurorisë së Vlorës për vlerësim.