Deputeti i larguar nga Partia Socialiste, Ben Blushi i ka “shkelur syrin” Ilir Metës duke lënë të hapur mundësinë e një koalicioni me LSI-në në zgjedhjet e 2017.
Duke folur për partinë e tij të re që pritet ta zyrtarizojë brenda disa javësh, Blushi deklaroi në emisionin “Studio e Hapur” se nuk ka asnjë plan për koalicionet që do të bëjë në 2017, por nuk ka përjashtuar mundësinë e koalicionit me LSI.
Por, kjo sipas tij me një kusht të vetëm, që Meta të mos jetë me Edi Ramën. Për këtë të fundit u shpreh se “nuk fluturon fare në horizontin e tij”, duke përjashtuar kategorikisht një koalicion me PS.
“Nëse është me Edi Ramën, nuk fluturon as ai para horizontit tim”, the Blushi për mundësinë e një koalicioni me LSI-në e Ilir Metës.
Ben Blushi ka treguar edhe një dallim mes PS dhe LSI. Në këtë të fundit, u shpreh deputeti, zhvillohen zgjedhje të brendshme.
“Rilindja nuk pranon që ta zgjedhë kryetarin, kurse LSI pranon që ta zgjedhë kandidatin e kryetarit”, theksoi Ben Blushi.