Ka përfunduar mbledhja e Komisionit për Reformën në Drejtësi. Në përfundim, deputeti demokrat, Eduard Halimi ka deklaruar se nesër nësë vijohet konsensusi mund të përmbyllet diskutimi politik.
Halimi: Diskutimi për reformën në drejtësi u bë sipas parimeve të Komisionit të Venecias. Arritëm konsensus për disa çështje dhe nësër nëse vijohet me konsensus mund të përmbyllet diskutimi politik. Diskutimi politik i hap rrugë ekspertëve.
Halimi tha se nesër në orën 10:30 do të zhvillohet takimi i radhës i Komisionit të Posaçëm për reformën në drejtësi.
Ndërkohe sot Komisioni i Posaçëm Parlamentar për reformën në drejtësi ka dhënë frytet e para duke arritur kompromisin e parë atë që quhet emergjencë e reformës në drejtësi për Byronë Kombëtare të Hetimit.
Burime pranë Komisionit bëjnë me dije se është rënë dakord që Byroja Kombëtare e Hetimit të jetë strukturë autonome nën varësi të drejtpërdrejtë të Prokurorisë Speciale e cila nuk do të ketë asnjë varësi nga Prokurori i Përgjithshëm dhe as nga policia.