Presidenti i Republikës ka dënuar ashpër një deklaratë të bërë në një intervistë televizive nga kryeministri Rama, lidhur me takimin e kreut të shtetit dhe sekretarit amerikan të Shtetit, John Kerry, në aeroportin e Rinasit.
Përmes një deklarate për shtyp, presidenti Nishani e ka cilësuar si “të papërgjegjshëm” komentin e kreut të ekzekutivit.
“Kërkesa e Sekretarit Kerry, e përcjellë përmes Ambasadës së SHBA-së në Tiranë për të takuar Presidentin e Republikës gjatë mbërritjes së tij në Shqipëri ishte një nder i veçantë dhe respekt ndaj Institucionit dhe vetë Presidentit Nishani”, thuhet në deklaratë.
Në të i kërkohet kryeministrit të vendit që “të tërheqë menjëherë deklaratën fyese dhe spekulative ndaj Presidentit të Republikës dhe Sekretarit të Shtetit të SHBA-së”.
“Një qëndrim i tillë nuk përfaqëson nderimin dhe mirënjohjen që shqiptarët anembanë botës kanë ndaj Shteteve të Bashkuara të Amerikës dhe popullit amerikan”, përfundon deklarata.
Por i menjehershem ka qene reagimi i kryeministrit ne facebook i cili ka shkruar: Presidenca me ka keqkuptuar! Thjesht isha e jam i keqardhur qe Presidenti i Shqiperise i doli avionit perpara. Si e pse kjo s’ka pike rendesie…
