Dokumentet, afati, kriteret, procedurat dhe pagesa për të gjithë farmacistët, të cilët duan të kryejnë praktiken
Dori Hoxha
Të gjithë farmacistët, të cilët kanë mbaruar studimet, duhet të regjistrohen për kryerjen e praktikës profesional për sezonin dhjetor 2015 – mars 2016, duke filluar nga data 15 dhjetor 2015 deri më datë 24 dhjetor 2015
Urdhri i Farmacistëve ka publikuar kriteret, afatin, dokumentet, procedurat dhe pagesën që duhet kryer për regjistrimin e të gjithë farmacistëve, të cilët duan të kryejnë praktikën profesionale për sezonin dhjetor 2015 – mars 2016. Sipas njoftimit të UFSH-së, regjistrime zgjasin dhjetë ditë, duke filluar nga data 15 dhjetor 2015 deri më datë 24 dhjetor 2015. Të gjithë praktikantët e regjistruar mund të kryejnë praktikën profesionale vetëm në farmacitë e rrjetit të hapur ose spitalore, nën drejtimin e një farmacisti me jo më pak se 3 (tre) vjet përvojë pune.
PROCEDURA DHE DOKUMENTET
Të gjithë farmacistët të cilët kanë mbaruar studimet duhet të regjistrohen për kryerjen e praktikës profesional duke dorëzuar kërkesën, vetëdeklarimin, fotokopjen të noterizuar të diplomës dhe listës së notave, kontratën tip për kryerjen e praktikës profesionale dhe fotokopjen e certifikatës së anëtarësimit në UFSH të drejtuesit të praktikës. Gjithashtu nevojiten 3 fotografi (3×3.5 cm), dhe fotokopje e kartës së identitetit. Sakaq, praktikanti duhet të kryejë edhe pagesën prej 10.000 lekësh në numrat e llogarive bankare, të cilat mund t’i gjeni bashkëngjitur këtij shkrimi, ndërkohë që mandat-pagesa duhet të bashkëngjitet me dokumentacionin që do të dorëzohet. Urdhri i Farmacistit përcakton se për t’u regjistruar në praktikën profesionale, kandidati duhet të paraqitet personalisht, në adresën: rruga “Xhanfize Keko”, Porcelan, Tiranë, pasi duhet të plotësojë kërkesën për regjistrimin dhe vetëdeklarimin e praktikantit. Në momentin e dorëzimit të dokumenteve të nevojshme, do të bëhet edhe nënshkrimi i kontratës, e cila rregullon marrëdhënien midis praktikantit dhe drejtuesit të praktikës, ndërsa një kopje e saj duhet të dorëzohet në zyrën e Urdhrit të Farmacistit të Shqipërisë në momentin e fillimit të praktikës.
KONTRATA E PRAKTIKËS PROFESIONALE
Objekt i kësaj kontrate është përcaktimi i të drejtave dhe detyrimeve që lindin për Drejtuesin e Praktikës dhe Praktikantin gjatë periudhës së kryerjes së praktikës. Afati i kontratës dhe hyrja ne fuqi e saj fillon nga data e nënshkrimit te saj nga palët dhe përfundon vlefshmërinë e saj me përfundimin e Praktikës Profesionale. Kontrata e praktikës lidhet midis farmacistit i cili do të jetë në rolin e Drejtuesit të Praktikës Profesionale dhe praktikantit me qëllim përgatitjen praktike të praktikantit për përvetësimin efektiv të njohurive teknike, praktike dhe etike të profesionit nga ana e tij, në përputhje të plotë me programin e praktikës. Kontrata garanton të drejtat dhe detyrimet e Drejtuesit të Praktikës për të dhënë eksperiencën e tij, duke respektuar parimin e lirisë kontraktuese, të barazisë dhe të respektimit të drejtë dhe të paanshëm të interesave të palëve. Oraret e zhvillimit të Praktikës do të jenë 6 (gjashtë) orë në ditë, 08:00 – 14:00, 5 ditë në javë (e hënë – e premte). Drejtuesi i Praktikes në përfundim të praktikës bën vlerësimin e njohurive praktike të praktikantit duke plotësuar “Formularin e Vlerësimit”.
Të Drejtat dhe detyrimet e palëve të drejtat dhe detyrimet e drejtuesit të praktikës
- Të jetë profesionist me përvojë jo më pak se 3 (tre) vjetësh. 2. Ti siguroje Praktikantit kushtet e nevojshme për realizimin e një praktike efektive. 3. Ti bëjë një vlerësim të drejtë dhe të paanshëm njohurive të Praktikantit dhe të pajisë praktikantin me Formularin e Vlerësimit të Praktikës. 4. Të drejtojë praktikën profesionale në përputhje të plotë me standardet, parimet
dhe normat e Kodit Deontologjik Farmaceutik, si dhe me legjislacionin farmaceutik në fuqi. 5. Ti kërkojë praktikantit respektimin e orarit dhe ta dokumentojë atë në librezën e praktikës profesionale. 6. Ti kërkojë Praktikantit kryerjen e praktikës profesionale në përputhje me rregulloren e UFSH për praktikën profesionale. 7. Të anulojë kontratën në rast shkeljeje të detyrimeve të saj nga ana e praktikantit dhe të njoftojë strukturat më të afërta të UFSH-së.
Të drejtat dhe detyrimet e praktikantit
- Të respektojë Drejtuesin e Praktikës në përputhje të plotë me normat e etikës dhe kodit deontologjik farmaceutik. 2. Të qëndrojë në farmacinë ku kryen praktikën gjatë gjithë periudhës së praktikës, të respektojë orarin e caktuar dhe të pranojë në fund të praktikës vlerësimin e bërë nga Drejtuesi i Praktikës. Praktika është program i detyrueshëm mësimor. 3. Të respektojë Drejtuesin e Praktikës dhe etikën e komunikimit me të dhe me pacientët. 4. Ankohet tek drejtuesi i institucionit si dhe tek strukturat më të afërta të UFSH-së për veprime që bien ndesh me këto të drejta apo tjetër veprim që e pengon, krijon vështirësi apo pamundësi në zhvillimin efektiv të praktikës. 5. Praktikanti që fiton të drejtën e anulimit të kontratës ekzistuese, për periudhën e mbetur nënshkruan kontratë me një drejtues tjetër praktike.
Kjo kontratë është një marrëveshje midis Drejtuesit të Praktikës dhe Praktikantit në lidhje me realizimin e periudhës së praktikës. Gjatë zhvillimit të praktikës profesionale, praktikantit i paguhen sigurimet shoqërore dhe sigurimet shëndetësore nga subjekti pranë të cilit ai kryen praktikën profesionale. Palët duhet të zgjidhin me mirëkuptim çdo mosmarrëveshje që mund të lindë si rrjedhojë e zbatimit të kësaj kontrate. Kontrata hartohet tre kopje me fuqi të njëjtë ligjore, nga të cilat një për secilën palë dhe një depozitohet në Urdhrin e Farmacistëve. Palët e lexojnë dhe pasi pranojnë e bien dakord me kushtet e kësaj kontrate, e nënshkruajnë atë, në dhe për interes të qëllimeve profesionale që përfaqësojnë.
Vlerësimi
Me përfundimin e praktikës profesionale, praktikanti duhet t’i nënshtrohet një provimi vlerësues dhe vetëm nëse ky provim kalohet, praktika profesionale quhet e kaluar me sukses. Për këtë, kandidati duhet të përfitojë 50-100 pikë, ndërkohë që praktikantët që marrin 0-49 pikë duhet ta përsëritin vlerësimin e aftësimit praktik. Kalimi me sukses i praktikës profesionale është një kusht për të hyrë në provimin e shtetit. Ndërkohë që, vetëm kandidati që vlerësohet pozitivisht në provimin e shtetit ka të drejtën e ushtrimit të profesionit.
Provimi i shtetit
Provimit të shtetit i nënshtrohen të gjitha profesionet e rregulluara në vendin tonë, ku farmacistët janë njëri prej tyre. Provimi ka për qëllim daljen në treg të profesionistëve më cilësorë në fushat e mjekësisë dhe mësuesisë. Sakaq provimi i shtetit për farmacistët për këtë sezon pritet të kryhet në muajin dhjetor 2015.