Kush do largohen menjëherë pas aprovimit të ligjit që po diskutohet në parlament, ligji i dekriminalizimit? Kjo është pyetja që shtohet. Edhe pse nuk është arritur ende tek emrat, ligji është i qartë.
Këta janë kategoritë e personave që nuk mund të jetë në politikë dhe administratë:
1- Largohen të dënuarit me burgim për një krim të rëndë. Ndalimi i këtyre është i përjetshëm. Nëse janë dënuar, nuk zgjidhen dot përjetë në të ardhmen. Nëse kanë kryer në të shkuarën, kurdo ta kenë kryer, humbasin mandatin aktual dhe nuk marrin me mandat kurrë.
2- Të dënuarit për korrupsion dhe krime zgjedhore. Nëse dikush dënohet nga hyrja ne fuqi e tutje, ndalohet për 20 vjet të tjera pas daljes nga burgu. Për ata që janë në detyrë sot, afati 20 vjet shtrihet në periudhën para fillimit të detyrës, pra retroaktiv në kohë.
3- Të dënuarit mbi 2 vjet me burgim, por që nuk janë dënuar për 2 pikat e mësipërme, ndalohen për 10 vjet. Nga datat e përfundimit të burgimit për rastet e ardhshme, dhe nga data e marrjes së detyrës 10 vite retroaktive.
4- Të dënuarit me burgim më shumë se 6 muaj për krim me dashje, ndalohen me të njëjtin mekanizëm si tek pikat 2 dhe 3, por afati është sa afati përkatës i rehabilitimit të dënimit të dhënë.
5- Personat e dëbuar në lidhje me një krim sipas pikave 1-3 apo i dëbuar se përbën rrezik për sigurinë dhe rendin publik nga një vend i BE-së, US-a Kanadaja, Australia apo vende të tjera që i cakton Kuvendi dhe që kanë një sistem juridik të konsoliduar. Përshembull: Norvegjia që nuk është anëtar i BE-së, Andorra, Lichtenstain etj. Ndalimi si kohë i korrespondon llojit të denimit sipas pikave 1-3, por në çdo rast jo me pak se 10 vjet.
6- Personat që kanë një masë sigurie personale si arrest etj, kanë një dënim jopërfundimtar apo janë në kërkim ndërkombëtar për rastet e pikave 1-3, nga një prej shteteve si tek pika 5. Për 10 vitet e para personat ndalohen të kandidojnë, zgjidhen apo ushtrojnë mandat, apo kur e kanë aktualisht mandatin, e humbasin. Pas kalimit të periudhës fillestare 10-vjeçare, ndalimi që aplikohet për këtë kategori është pezullimi i mandatit gjatë kohës që është nën proces penal. Pezullim dmth që nuk voton dot, nuk përbën numër për kuorumin ligjor, nuk nxjerr dot akte. Gjatë pezullimit.
7- Personat e dënuar për pikat 1-2 dhe janë në burg, e humbasin të drejtën e votës për periudhën që janë në burg. Kjo është risi për ne, por e kanë shumë vende të Europës.
Ligji parashikon moskandidim, zgjedhje, emërim, apo ushtrim funksioni kushtetues, ligjor, apo në shërbim civil, diplomatik, inteligjence, polici, ushtri, etj. Mekanizmi është vetëdeklarimi nëse je apo jo në kushtet e ndalimit. Nëse deklaron të dhëna të rreme, dënohesh penalisht sipas nenit 190 te Kodit Penal.
Nëse personi është dënuar apo në proces penal me identitet tjetër, shenjat e gishtërinjve janë kyçi që do bëjë identifikimin e plotë. Ndërkohë nuk është e qarte se çfarë do behet me testin e drogës.