Merr përmasa të mëdha skandali i korrupsionit në futbollin botëror, ku përveç Sepp Blatterit, i akuzuar është gjithashtu dhe presidenti i UEFA-s, Michel Platini. Sipas prokurorëve zviceran, Platini nuk është marrë thjesht në pyetje mbi çështjen Blatter, por është njëkohësisht dëshmitar dhe i akuzuar. Platini vetëm pak ditë më parë u përfol për një pagesë të padeklaruar prej dy milionë dollarësh të marrë në vitin 2011 nga presidenti i FIFA-s dhe për këtë çështje u mor në pyetje nga ana e Prokurorisë Zvicerane. Për mediat numri 1 i UEFA-s deklaroi se ishte thirrur thjesht në rolin e dëshmitarit dhe se pagesa e marrë prej tij në vitin 2011 ishte bërë publike në atë periudhë.
