Fondi Monetar Ndërkombëtar ka aprovuar këstin e radhës prej 35.9 milionë euro për Shqipërinë.
Kjo shumë është pjesë e huasë prej 300 milionë eurosh që qeveia shqiptare ka rënë dakord të marrë nga FMN me këste të njëpasnjëshme dhe me kusht që të jepet vetëm nëse plotësohen kriteret e vendosura për ecurinë ekonomike.
Dhënia e këtij kësti është shoqëruar me disa kërkesa nga FMN drejtuar qeverisë shqiptare. Ky institucion kërkon reduktimin e borxhit publik, uljen e nivelit të lartë të kredive me probleme dhe mbajtjen nën kontroll të defiçitit buxhetor.
Fondi Monetar Ndërkombëtar thekson se pavarësisht rimekëmbjes ekonomike rritja e saj është sërish nën potencial.
Niveli i lartë i huave me probleme i bën bankat të prirura ndaj rrezikut dhe rritja e kredisë mbetet e dobët, pavarësisht lehtësimit monetar të ofruar, thuhet në relacionin e Fondit që shoqëron levrimin e këstit të radhës së huasë.
Fondi Monetar Ndërkombëtar vlerëson ecurinë e marrëveshjes me Shqipërinë, por shprehet se rreziqet e këtij programi mund të rriten nga presionet e jashtme, kompleksiteti i reformave të sektorit të energjisë dhe nevojës për angazhim të qëndrueshëm politik ndaj rregullimit fiskal në mbledhjen e taksave.
Kujdesi i veçantë në ruajtjen e objektivave për defiçitin buxhetor kërkohet si pasojë e rënies së të ardhurave nga renta e naftës.
Kësti prej 35.9 mln euro e çon në rreth 153.1 mln € huanë e marrë nga FMN. Këto para sipas Ministrisë së Financave do të përdoren kreyesisht për shlyerjen e detyrimeve të prapambetura për biznesin.