Gëzim Saliu
PS merr qytetet e mëdha si Tirana, Durrësi, Vlora, Korça, Fieri e Elbasani. LSI merr kandidatët në Berat, Lezhë e Gjirokastër
Rama: Do jem unë negociatori me partitë e tjera, të hapur për PDIU-në, Milon e Gjinushin
Dy forcat kryesore të koalicionit të majtë, Partia Socialiste dhe Lëvizja Socialiste për Integrim, mbyllën dje marrëveshjen për ndarjen e bashkive në të cilat do të kandidojnë emra të përbashkët. Pas një takimi 80-minutësh në selinë e PS-së, kryesocialisti Rama dhe kreu i LSI-së Meta bënë të ditur se forca e drejtuar nga Kryeparlamentari do të ketë kandidatët e saj në 15 bashki, nga 61 gjithsej. Në këtë ndarje, që i jep LSI-së, si forcë e dytë e koalicionit të majtë, thuajse çerekun e të gjitha njësive vendore, dy partitë do të kenë të drejtën qe të refuzojnë kandidaturat e sjella, nëse i gjykojnë emrat si të papërshtatshëm. Ndërkaq, Partia Socialiste, si forcë e parë politike në vend dhe në kryesim të koalicionit të majtë, do të ketë kandidatët e saj në bashkitë e mëdha si Tiranë, Durrësi, Elbasani, Feri apo Korça.
Takimi dhe marrëveshja
Kryeministri Rama mbërriti në selinë e Partisë Socialiste rreth orës 10: 45 minuta dhe pak minuta pas tij në oborrin e saj u shfaq kreu i LSI-së, Ilir Meta. Ky i fundit kthehej në selinë e PS thuajse pas dy vitesh, pas takimit që zhvilloi në atë kohë me kryesocialistin Rama për marrëveshjen paraelektorale mes PS dhe LSI për zgjedhjet e 23 qershorit 2013. Në katër javët e fundit, takimet mes kreut të qeverisë dhe Kryeparlamentarit Meta kanë qenë të shpeshta dhe në fokus të takimit ka qenë pikërisht çështja e ndarjes së kandidatëve për 61 bashkitë, ndonëse nuk është lënë pas edhe diskutimit i çështjes “Doshi”. Nisur nga këto takime të shpeshta, ai i ditës së djeshme, ku kryetarët e partive kryesore shoqëroheshin nga krerët e grupeve respektive parlamentare, Ruçi dhe Vasili si edhe nga nënkryetari i PS-së Balla, dukej më së shumti një konfirmim i atyre çështjeve të diskutuara më parë. Por pavarësisht konsensusit, zgjatja e tij për 80 minuta tregoi se palët hasën jo pak vështirës në disa pika të marrëveshjes, të cilat në fund u mbyllën me konsensus. Kështu mësohet se LSI këmbëngulte në marrjen e bashkisë së Fierit apo të Elbasanit, ndonëse nga ana e saj PS i cilësonte të dyja këto bashki së prioritare të saj. Në këto kushte LSI u detyrua të “kënaqej” me Beratin, Lezhën e Gjirokastrën si bashki të mëdha, ndonëse kandidimi në 15 njësi vendore për partinë e Metës ishte një “pazar” me jo pak përfitime. Po ashtu edhe kushti i marrëveshjes sipas së cilave emrat e propozuar nga dy partitë për kandidatët në zonat përkatëse do të duhet të marrin konsensusin e palëve përbën edhe më shumë një “kushtëzim” të LSI-së ndaj PS-së, nisur nga fakti se kjo e fundit do të ketë kandidatë në më shumë se 40 bashki. “Për bashkitë Berat, Lezhë, Gjirokastër, Kukës, Pogradec, Kuçovë, Skrapar, Vorë, Bulqizë, Cërrik, Mallakastër, Delvinë, Përrenjas, Selenicë e Kolonjë. LSI ka përgjegjësinë të përgatisë propozimet që do të konsultohen me PS dhe anasjelltas PS pasi të përmbyllim edhe formulën përfundimtare të koalicionit”, – tha Rama. Nga ana e tij Kryeparlamentari Meta theksoi: “Ne jemi gjithmonë të prirë nga konsensusi, nuk jemi të prirë nga numrat. Nuk kemi paragjykime për emra, por kemi preferenca për cilësitë e kandidateve dhe të kandidatëve”.
Aleatët dhe PDIU
Sa u përket tratativave me aleatët e tjerë të koalicionit të majtë si edhe partitë e tjera që do të duan të bëhen pjesë e tij, Kryeministri Rama bëri të ditur se do të jetë ai negociatori. “Unë kam marrë dhe miratimin e bashkëkryetarit të Aleancës, për të negociuar me forcat e tjera politike të përgatisim propozimet për t’i vënë në shqyrtim në tryezën e përbashkët ku do kërkojmë konsensusin e LSI-së pasi pavarësisht gjerësisë së koalicionit është një koalicion që ngrihet mbi një bosht strategjik PS-LSI”, – tha Rama. I pyetur për një bashkëpunim të mundshëm me PDIU, Rama theksoi se PS dhe LSI mbetet të hapura për diskutime. “Për sa i përket marrëveshjes me partitë e tjera, ne kemi hapur diskutimet me të gjitha partitë e tjera, përveç PD-së kuptohet, dhe atyre satelitëve ballisto-republikanë që janë përfundimisht të ndarë nga rruga e historisë së re të këtij vendi dhe do të shikojmë hap pas hapi me të njëjtën logjikë. Ne nuk duam që të justifikohemi përpara asnjë komuniteti se këtë bashkinë e ka partia tjetër dhe partia tjetër ka bërë një zgjedhje për të cilën ne nuk mbajmë përgjegjësi. Jo! Përgjegjësia jonë është e përbashkët”, – tha ai. Lidhur me dy aleatët tradicionalë, kreun e PSD-së Skënder Gjinushi dhe atë të PDS-së Paskal Milo, të cilët edhe kanë bërë presion përmes mundësisë së krijimit të një poli të ri të majtë, Rama tha se mbeten të hapur për të gjithë. “Ne jemi në bisedime me të gjithë dhe sigurisht të gjithë kanë hapësirën për të kontribuuar në këtë proces pa kthim, që është procesi i modernizimit të pushtetit vendor”, – u shpreh Kryeministri.
Bashkitë që merr LSI, emrat e përcaktuar të kandidatëve deri tani
Berat – Gledion Rehovica
Lezhë – Viktor Tushaj
Kukës – Hasan Halili
Pogradec – Roshi Tollozhina
Gjirokastër
Kuçovë
Skrapar
Vorë
Bulqizë
Cërrik
Mallakastër
Delvinë
Përrenjas
Selenicë
Kolonjë
Bashkitë që merr PS, emrat e përcaktuar të kandidatëve deri tani
Tiranë – ( e papërcaktuar, ndahet mes Lindita Nikollës, Erion Veliajt, Pandeli Majkos dhe Blendi Klosit)
Vlorë – ( e papërcaktuar, ndahet mes Sadrit Danaj, Dritan Leli dhe Eltjona Hoxhës)
Durrës – Vangjush Dako
Shkodër – Keti Bazhdari
Elbasan – Qazim Sejdini
Korçë – Sotiraq Filo
Lushnjë – Fatos Tushe
Kavajë – Evis Roshi
Fier – (Salarjon Toto ose Kreshnik Tërnova)
Peqin – Bukurosh Maçi
Librazhd – Kastriot Gurra
Shijak – Indrit Buka
Gramsh – Dritan Bici
Tepelenë – Tërmet Peçi
Kurbin – Artur Bardhi
Mat – Adelina Farrici
Mirditë – Adrian Leka
Roskovec – Flamur Mato
Këlcyrë – Klement Ndoni
Pustec – Edmond Themelko
Kolonjë – Ali Laho
Libohovë – Vladimir Hide
Kuçovë
Divjakë
Belsh
Ura Vajgurore
Poliçan
Rrogozhinë
Maliq
Përmet
Devoll
Himarë