Shkrimtarit të shquar Ismail Kadare do t’i jepet Çmimi i Jeruzalemit për Lirinë e Individit në Shoqëri, njofton shtypi izraelit. Ky çmim letrar u jepet çdo dy vjet shkrimtarëve që trajtojnë në veprat e tyre temat e lirisë njerëzore në shoqëri.
Në të kaluarën, fitues të tij kanë qenë shkrimtarë që më vonë janë nderuar me “Nobelin” e letërsisë, si Bertrand Russell, Octavio Paz, V. S. Naipaul, John Maxwell Coetzee (Koc-zi) dhe Mario Vargas Llosa. Çmimi do t’i jepet Kadaresë më 8 shkurt nga kryebashkiaku i Jeruzalemit, Nir Barkat, në hapje të panairit ndërkombëtar të librit. Në ceremoni do të jetë i pranishëm edhe Presidenti izraelit, Reuven Rivlin.
Në motivacionin e jurisë thuhet mes të tjerash se “ndonëse Kadareja trajton tema dhe personazhe nga vendi i tij, kuptimi dhe rëndësia e tyre janë padyshim universale”. Çmimi i Jeruzalemit shoqërohet me një shumë simbolike prej 10 mijë dollarësh.
Disa nga librat e Kadaresë, duke përfshirë Gjeneralin e Ushtrisë së Vdekur, janë botuar edhe në hebraisht.
Sipas gazetës Haaretz, Kadare i dha shprehje lirisë njerëzore në shkrimet e tij. Arsyetimi i vendimit të jurisë së Jeruzalemit:
“Kadare është një tregimtar ironik dhe tepër interesant që rrëfen shkëlqyeshëm me nënkuptime të tërthorta rreth fajit kolektiv, veçanërisht në mos ndëshkimin e këtij faji… Edhe pse në formën e të shkruarit personazhet janë kryesisht lokalë, kuptimi dhe rëndësia janë padyshim universale”.
Ja lista e laureatëve të mëparshëm:
1963: Bertrand Russell
1965: Max Frisch
1967: Andre Schwarz-Bart
1969: Ignazio Silone
1971: Jorge Luis Borges
1973: Eugène Ionesco
1975: Simone de Beauvoir
1977: Octavio Paz
1979: Isaiah Berlin
1981: Graham Greene
1983: V. S. Naipaul
1985: Milan Kundera
1987: J. M. Coetzee
1989: Ernesto Sábato
1991: Zbigniew Herbert
1993: Stefan Heym
1995: Mario Vargas Llosa
1997: Jorge Semprún
1999: Don DeLillo
2001: Susan Sontag
2003: Arthur Miller
2005: Antonio Lobo Antunes
2007: Leszek Kolakowski
2009: Haruki Murakami
2011: Ian McEwan
2013: Antonio Muñoz Molina
“Provokacioni”, 11 tregime të Kadaresë në Spanjë
iç njofton revista spanjolle “El Cultural”, këto ditë shtëpia botuese “Alianza”, ka nxjerrë një vëllim me 11 tregime të Kadaresë me titullin “Provokacioni”. Tregimet janë përkthyer mjeshtërisht nga gjuha shqipe prej çiftit të bashkëshortëve Maria Roces dhe Ramon Sánchez Lizarralde.