Kryetari i Partisë Demokratike pret delegacionin e Bankës Botërore
Spastrimet në administratë, kreu i PD-së, Basha: Rreth 8 mijë burra dhe gra, specialistë e profesionistë që mbeten pa punë
Kryetari i Partisë Demokratike, Lulzim Basha, priti dje në selinë e PD-së një delegacion të Bankës Botërore të kryesuar nga zëvendëspresidentja për Evropën dhe Azinë Qendrore, Laura Tuck. Në këtë takim Basha ndau shqetësimin e opozitës për përkeqësimin e treguesve ekonomikë e fiskalë, për mungesën e transparencës dhe pasigurinë që ka krijuar në vend mossundimi i ligjit.
Duke analizuar zhvillimet në ekonomi të këtyre 9 muajve, Basha tha se rritja e nivelit të borxhit publik, rritja e pasigurisë, ndalja e investimeve publike dhe intimidimi i investimeve private përmes arbitraritetit qeveritar dhe shkeljes së ligjit kanë kontribuar në rënien e rritjes ekonomike dhe shtimin e papunësisë.
Me gjithë rritjen e taksave dhe akcizave, Basha tha se qeveria ka dështuar në objektivat e shpallura të mbledhjes së të ardhurave. Duke iu referuar vetë buxhetit dhe planit të ekzekutivit, që parashikon mbledhjen e 40 miliardë lekëve, faktet tregojnë se me ecurinë e derisotme nuk arrihet as gjysma e kësaj shifre.
Duke iu referuar raporteve të institucioneve financiare të cilat konstatojnë në vijimësi se ka rënie të kreditimit, konsumit dhe punësimit, kryetari i opozitës theksoi domosdoshmërinë e përballjes me realitetin dhe jo përhumbjen në propagandë apo falsifikim të të dhënave siç po bën aktualisht qeveria për konsum mediatik. Në të kundërt, pasojat do të bëhen gjithmonë e më të rënda dhe të papërballueshme për qytetarët dhe vendin, theksoi Basha.
Sipas zyrës së shtypit të Partisë Demokratike, kryetari i opozitës Basha, e cilësoi si shumë shqetësuese edhe mungesën e transparencës nga ana e qeverisë për sa i përket vendimmarrjes në tërësi dhe prokurimeve publike në veçanti, çka dëshmon për rritje të informalitetit dhe korrupsionit.
“Z. Basha informoi delegacionin e Bankës Botërore për shqetësimin që ka krijuar në vend shkelja e ligjit nga ana e qeverisë, dhe moszbatimi i vendimit të gjykatave.
Duke u ndalur tek shkelja e Kushtetutës, në rastin e moszbatimit të ligjit për nëpunësin civil, Basha tha se pasojat ishin dramatike për vendin pasi mundësuan një spastrim masiv në administratë çka solli rreth 8 mijë burra dhe gra, specialistë e profesionistë që mbeten pa punë.
Delegacioni i lartë i Bankës Botërore u njoh edhe me një tjetër zhvillim negativ për demokracinë në vend, që ka të bëjë me përpjekjet e vazhdueshme të qeverisë për kapjen e institucioneve të pavarura.
Përfaqësuesit e Bankës Botërore e vlerësuan shkëmbimin e informacionit dhe pikëpamjeve me opozitën e vendit dhe u shprehën të gatshëm për të mbajtur një dialog të vazhdueshëm me Partinë Demokratike”, – thuhet në njoftimin për shtyp të Partisë Demokratike.
Deputeti i PS-së
Situata politike, Blushi: Shqipëria po qeveriset nga paaftësia
“Vakuumi i shtetit po mbushet nga feja”
Deputeti i Partisë Socialiste Ben Blushi hodhi akuza të ashpra një ditë më parë ndaj qeverisjes aktuale. Gjatë prezantimit të librit “Hëna e Shqipërisë”, në qytetin e Elbasanit, Blushi u shpreh se Shqipëria po qeveriset nga paaftësia. Duke folur për realitetin politik dhe shoqëror, Blushi theksoi se Shqipëria është një vend ku nuk zbatohet ligji dhe është më e pabarabartë se 5 vite më parë. Ndërsa për sa i përket çështjes së fesë ai u shpreh se vakuumi i lënë nga shteti po mbushte nga feja. “Nuk kam asnjë paragjykim për fetë. Në disa zona shteti nuk ekziston. Vakuumi i lënë nga shteti po mbushet nga feja. Duhet që shkalla e fetarizimit të mos rritet, nuk është mirë. Ky fenomen po ndodh në Turqi dhe Arabi. Ne jemi për demokraci dhe jo për teokraci”, – është shprehur Blushi. Më herët Blushi ka kritikuar qeverinë për trafikun e drogës dhe për mosndërhyrjen në Lazarat.
Në deklaratat e bëra disa ditë më parë deputeti socialist ka kritikuar Kryeministrin Rama për këtë çështje, ndërsa ka thënë se nga njohja e tij personale e di që ministri i Brendshëm Saimir Tahiri është i gatshëm të ndërhyjë në Lazarat për çështjen e drogës, por sipas tij ministri ka një punë tjetër më të vështirë, atë për të bindur kreun e ekzekutivit, Edi Rama.
“Ministrin e Brendshëm unë e kam mik, e di që nuk ka frikë të hyjë në Lazarat. Është shumë trim sepse e njoh, por ka një problem, duhet të bindi kryeministrin e vet që të hyjë në Lazarat, sepse vetëm s’mund të hyjë. Dhe tani duhet të presim që ministri i Brendshëm që është shumë trim të bindi kryeministrin që të hyjë në Lazarat. Pyetja që unë kam është pse nuk hyn në Lazarat? Për sa kohë që ne e dimë ku është krimi, kush e bën, kush e nxjerr, kush e prodhon, kush e mbjell, pse nuk ndërhyjmë atëherë? Pse shtetit pranon kapitullimin e tij?! Unë nuk e pranoj këtë gjë, refuzoj! Shteti e di ku është krimi dhe thonë: unë do hyj kur të bëhem gati. Po pse kur të bëhet gati? S’kemi ushtri, s’kemi polici, s’kemi opinion publik krejtësisht kundër Lazaratit? Opinioni publik është krejtësisht kundër” – ka thënë Blushi. Ndërkohë, pak javë më parë Kryeministri Edi Rama në një intervistë televizive, ka thënë se qeveria do të ndërhyjë në Lazarat kur të jetë momenti.
Në deklaratat e tij Blushi ka thënë se opozita po bën të njëjtat gabime që ka bërë e majta kur nuk ishte në qeverisje. Deputetit socialist pranon aksionet e dikurshme opozitare si të gabuara për interesat e vendit, duke theksuar se ato po përsëriten edhe tani në prag të shqyrtimit të statusit të vendit kandidat për Shqipërinë në Bruksel në muajin qershor.