Psikologji/ Biznes Mos i mbroni idetë tuja, kërkoni kritika

0
155

psikoNjë pjesë e madhe e kohës në negocim harxhohet duke kritikuar. Më mirë sesa t’u rezistoni kritikave të palës tjetër, kërkojini ato. Në vend që t’u thoni atyre ta pranojnë apo hedhin poshtë një ide, pyetini se çfarë nuk shkon në këtë ide: “Cilin shqetësim tuajin nuk e merr parasysh ky propozim pagash?” Shqyrtoni gjykimet e tyre negative për të zbuluar interesat në themel të tyre si dhe për të përmirësuar idetë tuaja nga pikëpamja e tyre. Ripunoni idetë tuaja duke u nisur nga ajo çka mësoni prej tyre dhe në këtë mënyrë kthejini kritikat nga një pengesë në procesin e arritjes së një marrëveshjeje në një element thelbësor të këtij procesi. “Nëse po ju kuptoj drejt, ju po thoni se nuk mund ta përballoni një rritje page prej më shumë se 2000 dollarë për 750 mësuesit që keni. Po sikur ne ta pranojmë këtë, me kusht që të gjitha paratë e kursyera duke punësuar më pak se 750 mësues me kohë të plotë t’u shpërndahen si shpërblim mujor mësuesve që janë aktualisht në punë?”

Një mënyrë tjetër për t’i kanalizuar kritikat në një drejtim konstruktiv është ta ndryshoni krejtësisht situatën dhe të kërkoni këshillën e tyre. Pyetini se çfarë do të bënin po të ishin në pozicionin tuaj. “Çfarë do të bënit nëse do të rrezikohej puna juaj? Anëtarët tanë ndihen kaq të pasigurt për punën dhe të zhgënjyer nga ulja e pagave, saqë po diskutojnë t’i kërkojnë një sindikate militante t’i përfaqësojë. Nëse do ta drejtonit ju këtë shoqatë, si do të vepronit?” Pra, në këtë mënyrë ju i nxitni ata të përballen me gjysmën tuaj të problemit. Duke vepruar kështu, ata mund të jenë në gjendje të gjejnë një zgjidhje që përmbush interesat tuaja. “Një problem më vete është se mësuesit mendojnë se askush nuk po i dëgjon. A nuk do të ishte mirë të organizoheshin takime të rregullta, në të cilat mësuesit të mund të konsultoheshin me këshillin drejtues të shkollës?”

 

Drejtojeni për nga problemi sulmin që ju bëhet

Kur pala tjetër ju sulmon personalisht – siç ndodh shpesh – rezistojini tundimit për t’u mbrojtur apo për t’i sulmuar. Më mirë merreni shtruar dhe lërini ata të nxjerrin dufin. Dëgjojini dhe bëjuani të ditur se ju e kuptoni atë çka ata po thonë. Kur të kenë mbaruar, drejtojeni sulmin mbi ju për nga problemi. “Kur ju thoni se një grevë tregon se ne nuk duam t’ia dimë për fëmijët, unë e kuptoj shqetësimin tuaj lidhur me edukimin e fëmijëve. Unë dua që ju ta dini se edhe ne e kemi këtë shqetësim: ata janë fëmijët dhe studentët tanë. Ne duam që greva të përfundojë, në mënyrë që ata të kthehen në bankat e shkollës. Çfarë mund të bëjmë së bashku për të arritur një marrëveshje sa më shpejt që të jetë e mundur?”

 

Bëni pyetje dhe pastaj heshtni

Ata që angazhohen në negocimin “xhuxhicu”, mbështeten në dy mjete të rëndësishme: përdorimi i pyetjeve në vend të deklaratave dhe heshtja.

Deklaratat gjenerojnë rezistencë, ndërsa pyetjet gjenerojnë përgjigje. Pyetjet e lejojnë palën tjetër t’i bëjë çështjet e saj të qarta, në mënyrë që ju t’i kuptoni. Ato paraqesin sfida dhe mund të përdoren për ta nxitur palën tjetër të përballet me problemin. Pyetjet nuk u ofrojnë atyre asnjë objektiv për ta goditur, asnjë pozicion për ta sulmuar. Pyetjet nuk kritikojnë, ato edukojnë. “A mendoni se do të ishte më mirë që mësuesit të bashkëpunonin në një proces dhe të ishin të ndërgjegjshëm për pjesëmarrjen në të, apo t’i rezistonin vendosmërisht një procesi për të cilin ata mendojnë se po u imponohet dhe se nuk merren parasysh shqetësimet e tyre?”

Heshtja është një nga armët tuaja më të mira. Përdoreni atë. Nëse ata kanë bërë një propozim të paarsyeshëm ose një sulm që ju e gjykoni si të pajustifikuar, gjëja më e mirë që mund të bëni është të uleni e të mos thoni asnjë fjalë.

 

 

Web Agency, Digital Agency, Web Development Agency