“Mbrojtja Civile Serbe” që vepron në pjesën veriore të Kosovës, mund të jetë partner i paqeruajtësve të NATO-së në të ardhmen, sinjalizon komandanti i KFOR-it Volker Halbauer, sipas të cilit baza juridike për cilëndo organizatë në Kosovë duhet të sqarohet paraprakisht.
Gjeneral-Majori gjerman që udhëheq misionin e NATO-së në Kosovë, tha të martën se gjëja kryesore në përzgjedhjen e partnerëve në terren, është që ata t’i përshtaten mandatit të KFOR-it për ruajtjen e një mjedisi të qetë dhe të sigurt.
“Unë nuk do të argumentoj rreth bazës ligjore të cilësdo organizatë në Kosovë. Kushdo që ka bazë ligjore, kjo është çështje tjetër, dhe vendimi duhet të merret nga autoritetet tjera. Për ne si KFOR, kushdo që kontribuon për një mjedis të qetë dhe të sigurt, është partner joni, e kush nuk e bënë këtë gjë, nuk është partner i joni”, u përgjigj Halbauer kur është pyetur rreth një partneriteti të mundshëm me “Mbrojtjen Civile”.
Ky trup, të cilin autoritetet në Prishtinë e konsiderojnë si ilegal, është shfaqur në nëntor të vitit të kaluar në publik në pjesën veriore të Mitrovicës.
Komandanti i KFOR-it Volker Halbauer i shtjelloi këto gjëra pas një takimi që zhvilloi me ministrin e kthimit dhe komuniteteve Dallibor Jevtiq, i cili refuzoi të komentojë punën e Mbrojtjes Civile Serbe në veri. Pas bisedave që zhvilluan në zyrat e qeverisë, Jevtiq përmendi çështjen e veriut, për të cilën tha se është lehtësim që ka marrëveshje me Prishtinës dhe Beogradit.
“Gjithsesi, një prej konkludimeve tona është që marrëveshja e arritur në Brukseli, në masë të madhe do të ndihmoj përveç ministrinë e kthimit, po ashtu edhe do të lehtësoj misionin e KFOR-it ka këtu në Kosovë, e që është shumë e rëndësishme”, tha Jevtiq.
Pjesëtarët e Mbrojtjes Civile Serbe në veri janë të uniformuar, dhe komandohen nga Kërstimir Pantiq, që është shef i shtabit të Mbrojtjes Civile matanë lumit Ibër.
Pantiq ka pati deklaruar për mediet serbe se kjo organizatë është e formuar në kuadër të ligjit për situata të jashtëzakonshme të Republikës së Serbisë, dhe në përputhje me Konventën e Gjenevës, si një organizatë komunale nën kontroll të autoriteteve lokale.
Gjeneral-Majori Halbauer bëri të ditur se nuk ka ndikim në proceset politike, meqë është ushtarak, por ka besim që dialogu do të sjell rezultat premtues.
Komandanti i forcave paqeruajtëse, foli edhe për barrikadat në veri, të cilat siç tha ai pret që të largohen, pa shkaktuar incidente. “Na lejoni që të largojmë barrikadën e fundit-të vërtetë-në pjesën veriore të Kosovës e vendosur mbi urën Austerlitz në paqe. Kjo është ëndërr e imja, që ta bëjë këtë gjatë këtij vitit, në mënyrë paqësore, bashkë me të gjitha palët e përfshira në këtë çështje” tha komandanti i KFOR-it Volker Halbauer.
Më se 50 ushtarë të KFOR-it janë lënduar vitin e kaluar, gjatë përpjekjeve për të larguar barrikada në veri. Prej asaj kohe, përveç shqiptarëve probleme me lëvizjen e lirë në zonën veriore, kanë edhe misionarët e EULEX-it, pasi serbët kundërshtojnë transportimin dhe vendosjen e policëve dhe doganierëve shqiptarë në kufijtë verior.
