Raundi çerekfinal luajti dje ndeshjet e treta, teksa Bylisi e Skënderbeu kanë bërë hapin e madh, atë të kualifikimit, duke qenë të vetmet me 9 pikë të plota deri më tani, ndërsa Teuta dhe Shkumbini i kanë dhënë lamtumirën Kupës
Ndeshjet e Kupës së Shqipërisë ulën siparin për vitin 2012 të futbollit në vendin tonë. Edhe një herë rezultatet i kanë dhënë të drejtë Skënderbeut që me shumë mundësi këtë vit, përveç kampionatit, do të tentojë të marrë edhe trofeun e dytë për nga rëndësia në vend.
Verdikti
Bylisi e Skënderbeu kanë bërë hapin e madh, atë të kualifikimit, duke qenë të vetmet me 9 pikë të plota deri më tani, ndërsa Teuta dhe Shkumbini i japin lamtumirën Kupës së Shqipërisë. Pasi i kishin fituar dy çerekfinalet e para, korçarët dhe ballshiotët, kryesues të grupeve të tyre përkatëse, gjendeshin përballë rivalësh me të ndryshëm, por fundi ka qenë i njëjtë.
Grupi A
Skënderbeu hodhi një hap të sigurt drejt kualifikimit në gjysmëfinale të Kupës së Shqipërisë, pasi mposhti 2-1 në transfertë Kastriotin, që gjithashtu ka pretendime serioze për t’i shkuar deri në fund këtij objektivi. Skuadra korçare tregoi edhe në Kupë se është skuadra më e fortë e futbollit shqiptar, duke konfirmuar gjithashtu se dominimi edhe në kampionat nuk është i rastësishëm. Pavarësisht se trajneri Mirel Josa para ndeshjes do të deklaronte se Kastrioti është shumë i vështirë për t’u mundur, 90 minutat e Krujës folën përgjithësisht për ekipin mik, që kaloi në avantazh pa u mbushur endë 20 minuta lojë me Pero Pejiç, i cili shfrytëzoi pasigurinë e mbrojtjes dhe të portierit Osmani. Ky gol i jep më shumë siguri lojës së Skënderbeut, që dyfishon rezultatin në fund të pjesë së parë me Sebino Plakun, që shfrytëzon në maksimum një harkim të saktë të Radas nga e djathta. Në pjesën e dytë korçarët kërkojnë të administrojnë lojën, por Caca 4 minuta para përfundimit ngushtoi diferencën. Pavarësisht nga dëshira e krutanëve për ta barazuar rezultatin, minutat e mbetura nuk mjaftuan që Kastrioti të merrte një pikë. Në përballjen tjetër të grupit A, Kukësi fitoi 2-0 në shtëpi me Shkumbinin, falë golave të Allmuçës me 11-metërsh dhe Malos vetëm pak minuta nga fundi i ndeshjes.
Grupi B
Flamurtari arriti fitoren e dytë kupë, këtë herë në Vlorë përballë Laçit, që e mposhti me rezultatin 2-1. Formacioni i Ernest Gjokës e kishte vlerësuar maksimalisht këtë kundërshtar edhe për faktin se ishte mundur në shtëpi nga laçianët në javën e dytë të kampionatit. Pas një fillimi të ekuilibruar, Flamurtari kaloi në avantazh në minutën e 38 me një supergol të Hair Zeqirit, që u pasoi nga një tjetër finalizim i bukur i Gjergji Muzakës, që dhanë përshtypjen e një fitoreje të lehtë. Në pjesën e dytë Laçi kërkon të fitojë terren, derisa arrin ta ngushtojë diferencën me Erion Vucajn, i cili tregohet tepër i saktë nga një distancë rreth 20 metra. Në takimin tjetër të këtij grupi Bylisi shkatërroi 5-0 në “Adush Muça” Teutën, që me shumë mundësi i ka larë duart nga Kupa.
Çerekfinalet e Kupës së Shqipërisë, ndeshjet e treta
19.12.2012
Grupi A
KASTRIOTI-SKËNDERBEU 1-2
Golat: Caca 87′ (pen) / Pejiç 16′, Plaku 43′
KUKËSI-SHKUMBINI 2-0
Golat: Allmuca 83′ (pen), Malo 85′
Grupi B
BYLIS-TEUTA 5-0
Golat: Izuçuku 4′ (pen), 7′, Bakiu 5′, 41′, Meto 89′
FLAMURTARI-LAÇI 2-1
Golat: Zeqiri 39′, Muzaka 44′ / Vucaj 67′
Renditja
Grupi A
Nd F B H Pikë
Skënderbeu 3 3 0 0 9
Kukësi 3 2 0 1 6
Kastrioti 3 1 0 2 3
Shkumbini 3 0 0 3 0
Grupi B
Nd F B H Pikë
Bylis 3 3 0 0 9
Flamurtari 3 2 0 1 6
Laçi 3 1 0 2 3
Teuta 3 0 0 3 0