Grupet e tifozëve ekstremistë të Zenitit të Shën Pjetërburgut, kampionit në fuqi në kampionatin rus, publikuan ditën e hënë një manifest, në të cilin i kërkohet drejtuesve të klubit të tyre që të mos blejnë futbollistë me ngjyrë apo homoseksualë. “Nuk jemi racistë, por mungesa e futbollistëve me ngjyrë apo homoseksualë në gjirin e Zenitit është një traditë e rëndësishme, e cila përforcon identitetin e këtij klubi”, – shkruhej në manifest. Dokumenti, i cili ka bërë bujë për përmbajtjen e tij, nënvizon se skuadra nuk ka pasur kurrë lidhje dhe as tifozë në Afrikë, Amerikën e Jugut, Australi apo Oqeani: “Nuk kemi asnjë kundër banorëve të këtyre kontinenteve, por duam që tek Zeniti të luajnë futbollistë që të jenë të afërt për nga mendësia dhe shpirti i tyre me tifozerinë ruse”. Aktualisht, tek Zeniti nuk militon asnjë futbollist me ngjyrë, por tifozët mund t’i referohen dy blerjeve të fundit, brazilianit Hulk dhe mesfushorit mulat belg, Vitsel, që i kushtuan arkave të klubit rreth 90 milionë euro së bashku. Nga ana e tij, klubi me qendër Shën Pjetërburg, qytetin e dytë më të madh në Rusi, ka dënuar ashpër këtë deklaratë, duke evidentuar se skuadra është dalluar gjithmonë për “tolerancën dhe respektin ndaj të gjitha vlerave njerëzore”.