Tiranë I dënuar me 30 vite në Itali për trafik droge, arrestohet 31-vjeçari

Një 31-vjeçar është vënë në pranga dy netë më parë nga policia e Tiranës, pasi kërkohej nga drejtësia italiane për trafik droge. Sipas burimeve zyrtare policore, i riu kërkohej nga drejtësia italiane, pasi e kishte dënuar me 30 vite burg për pjesëmarrje në organizata kriminale në fushën e trafikimit të lëndëve narkotike. Agjentët e antidrogës të komisariatit nr.2 e kanë arrestuar Xhulio Veizin në zonën e “21 Dhjetorit”, pasi i kishin ardhur letrat nga shteti fqinj. Fillimisht, policia nuk e kishte mjaft të qartë nëse ishte ky personi që kërkohej nha policia dhe vetëm mëngjesin e djeshëm është saktësuar identiteti i tij dhe u konfirmua për Interpol Tiranën se ishte 31-vjeçari që kërkohej. Xhulio Veizi ishte nën vëzhgimin e policisë prej disa ditësh dhe vetëm dy netë më parë finalizuan operacionin e kapjes së tij. Sipas policisë shqiptare, Veizi, i cili akuzohet për trafik ndërkombëtar droge, është dënuar në Itali me 30 vjet burg. Arrestimi i tij erdhi si bashkëpunim i Interpol Tiranë me zyrën e Interpolit në Itali, ndërkohë pritet që brenda pak ditësh të bëhet edhe ekstradimi i tij në shtetin fqinj, ku do të vuajë dënimin përkatës. Materialet ndaj tij do t’i dërgohen Gjykatës së Tiranës për ekstradim dhe do jetë kjo e fundit që do vendosë mbi fatin e Veizit. I riu e ka të pamundur për të njohur vendimin në gjykatat shqiptare, pasi në vendin tonë nuk ka dënime me 30 vite burg, pasi maksimalja është 25 vite burg ose me burgim përjetë.