Florenc Drizari
Paloka: Rama, bllok kundër NATO-s, bllok kundër liberalizimit të vizave dhe tani për të tretën herë radhazi, bllok për statusin
Pas deklaratave që numrit dy i socialistëve, Gramoz Ruçi, bëri në Asamblenë e Përgjithshme të PS-së lidhur me humbjen për të tretën herë të statusit të vendit kandidat, i menjëhershëm ishte edhe reagimi i përfaqësuesve të PD-së, duke bërë përgjegjës lidershipin e majtë për qëndrime kundër interesave integruese të shqiptarëve.
Deputeti demokrat Edi Paloka akuzoi kreun e Partisë Socialiste Edi Rama si penguesin kryesore për mosmarrjen statusit të kandidatit nga Shqipëria. Sipas tij, qëndrimi bllokues kundër proceseve integruese të vendit nga kryesocialisti Rama është i njohur për shqiptarët dhe përfaqësuesit ndërkombëtar. Për këtë, deputeti Paloka përmendi qëndrimin e mbajtur nga opozita për anëtarësimin në NATO dhe liberalizimin e vizave. “Dëgjuam këto ditë në Parlamentin Evropian disa komunistë grekë, të cilët kundërshtonin me forcë anëtarësimin e Shqipërisë në Bashkimin Evropian. Një hap që sigurisht revolton çdo shqiptar. Por çfarë mund t’u kërkojmë ne komunistëve grekë, kur autori i vërtetë i bllokimit të shqiptarëve është një pinjoll i komunistëve, i bllokmenëve shqiptarë: kryetari i ish-Partisë Komuniste Shqiptare, i cili edhe në 100-vjetorin e pavarësisë u tregoi shqiptarëve se është kundër të ardhmes dhe interesave të tyre. Antishqiptar duket si një epitet i rëndë, por në fund gjithsecili nga ne gjykohet për veprimet e tij dhe Rama në gjithë këto vite nuk ka bërë gjë tjetër veçse ka tentuar të bllokojë të ardhmen e shqiptarëve. Bllok kundër NATO-s, bllok kundër liberalizimit të vizave dhe tani për të tretën herë radhazi, bllok për statusin e vendit kandidat për në Bashkimin Evropian”, – deklaroi Paloka.
PËR KOMUNISTËT GREKË
Deputeti i Partisë Demokratike Edi Paloka sulmoi Ramën se nuk po dëgjon as thirrjet e ndërkombëtarëve, të cilët i kërkuan votimin e tri ligjeve. Deputeti Paloka bëri edhe një analogji mes qëndrimit të kryesocialistit për tri ligjet me deklaratat e bëra dy ditë më parë nga deputetë grekë në parlamentit e BE-së, të cilët u shprehën kundër integrimit të Shqipërisë në BE. “Për ditë me radhë shqiptarët, por edhe miqtë e mëdhenj të shqiptarëve deri te personalitetet më të larta të diplomacisë ndërkombëtare, i kërkuan Ramës të linte mënjanë interesat e tij dhe të punonte për interesat e shqiptarëve duke votuar tre ligje në Parlament si të vetmet kushte për realizimin e një hapi tjetër drejt integrimit. Por Rama, edhe këtë herë, vendosi të bashkohet me komunistët grekë kundër shqiptarëve. Dëmi që u solli shqiptarëve nuk janë vetëm ato miliona euro, që në një kohë të vështirë si kjo në fakt do t’u bënin mirë shqiptarëve dhe sidomos atyre për të cilët Rama bën sikur përgjërohet: shqiptarëve të varfër. Por, dëmi më i madh është ai moral. Dëmi i vërtetë është ai përballë miqve tanë evropianë që nuk mund ta konceptojnë sesi një kryetar partie shqiptare mund të ngrihet kundër interesave të popullit të tij.
Sidoqoftë Rama nuk mund të bllokojë natyrshmërinë dhe vendi i natyrshëm i shqiptarëve është Bashkimi Evropian. Ky është bllokimi i fundit që ai po u bën shqiptarëve, sepse në 2013-ën, në fushatë, i ka mbetur t’u mburret shqiptarëve, siç po bën në fakt edhe tani, vetëm se është 2 metra i gjatë dhe madje pa taka. Pasi për asgjë tjetër nuk mund t’u mburret apo t’u thotë shqiptarëve se ka interesa të përbashkëta me ta. Prandaj, 2013-ta do të jetë edhe viti kur shqiptarët do ta çojnë Ramën përfundimisht aty ku i takon”, – tha Edi Paloka gjatë një deklarate për shtyp në selinë e PD-së.
