Ina Jano
Zëdhënësja e qeverisë njoftoi se mbledhja e radhës do të zhvillohet të martën në datën 4 dhjetor, në orën 10:00, ashtu si 100 vjet më parë
Një shekull më parë, ishte Ismail Qemali ai që mblodhi qeverinë e parë në qytetin e Vlorës, pas shpalljes së pavarësisë, ndërsa tashmë, nën drejtimin e Kryeministrit, zotit Sali Berisha, qyteti bregdetar do ta përjetojë edhe një aktivitet të tillë. Lajmin e bëri dje të ditur zëdhënësja e kabinetit të ministrave, zonja Majlinda Bregu. Nga selia e Kryeministrisë në një deklaratë të veçantë për shtyp ministrja e Integrimit tha se në datën 4 dhjetor të vitit 2012, në orën 10:00 qeveria do ta mbajë mbledhjen e radhës në këtë qytet për të nderuar figurën e Ismail Qemalit, duke shtuar se festimet e 100-vjetorit të pavarësisë do të vijojnë ende. “Festimet për 100-vjetorin e pavarësisë nuk kanë mbaruar. Kujtesa jonë kombëtare na sjell në këtë fillim dhjetori një tjetër ngjarje po aq të rëndësishme sa ngritja e flamurit në Vlorë dhe shpallja e shtetit shqiptar si i pavarur. 4 dhjetori i 1912-ës është një tjetër ditë e shënuar në historinë e Shqipërisë: është dita e themelimit të qeverisë së parë shqiptare, e qeverisë së parë shqiptare, pas kohës së Skënderbeut. Në 4 dhjetor 1912, Kuvendi i Vlorës zgjodhi qeverinë e parë me Kryeministër Ismail Qemalin, i cili në atë kohë kishte edhe funksionin e ministrit të Jashtëm”, – tha zëdhënësja e kabinetit qeveritar, duke u ndalur edhe në aspektin historik të ngjarjes. Njëherazi bashkë me këtë paralelizëm ajo nënvizoi se këtë herë, nën drejtimin e Kryeministrit Sali Berisha, do të mbahet mbledhja e radhës e qeverisë, në nderim të këtij akti madhor në histori, të themeluesve të pavarësisë shqiptare dhe të Kuvendit të Vlorës. Në rendin e përhershëm mbledhjet e kabinetit qeveritar, mbahen në selinë e Kryeministrisë, në sallën e posaçme për mbledhjet e kabinetit, çdo të mërkurë në orën 11:00 të paradites. Javën e shkuar, për shkak të festave të nëntorit, nuk u zhvillua mbledhja e qeverisë e javës, një nga rastet e rralla kjo, pasi edhe në stinën e verës zoti Berisha nuk i ndërpret mbledhjet me kabinetin e tij qeverisës. E njëjta gjë ndodh edhe në rastet kur ai largohet nga vendi. Në këto raste mbledhjet lëvizin me një ose dy ditë nga rendi i përjavshëm i tyre. Gjithashtu, zonja Bregu u shpreh se në nderim të veprës së Ismail Qemalit dhe ministrave të qeverisë së parë shqiptare, pas kohës së Skënderbeut, në 4 dhjetor të javës tjetër do të jenë përsëri në Vlorë. Ajo risolli në vëmendje qeverinë e Ismail Qemalit, që kishte në përbërje të saj 10 ministra, politikanë, aktivistë dhe njerëz tepër të shquar, ku veçoi figura të tilla si zv.kryeministri Dom Nikollë Kaçorri, një personalitet i spikatur i Kishës Katolike, sekretar i Arqipeshkëvisë së Durrësit; ministri i Brendshëm, Myfit Libohova, politikan i shquar shqiptar; ministri i Arsimit, Luigj Gurakuqi, një nga figurat kryesore të lëvizjes sonë atdhetare dhe demokratike; ministri i Drejtësisë, Petro Poga, botues i gazetës “Drita” të Stambollit; ministri i Bujqësisë, Pandeli Cele; ministri i Financave, Abdi Toptani; ministri i Luftës, Mehmet pashë Dërralla, një ndër protagonistët e Lidhjes Shqiptare të Prizrenit të vitit 1878; ministri i Punëve Botore, Mit’hat Frashëri, një tjetër figurë e spikatur në politikën shqiptare në gjysmën e parë të shekullit XX e deri tek ministri i Postë-Telegrafës, Lef Nosi, nënshkrues i Aktit të Pavarësisë. Sa u përket disa prej reformave që qeveria e parë ndërmori, zëdhënësja e Këshillit të Ministrave tha se ishin pikërisht këto reforma që do të hapnin rrugën për zhvillimin demokratik të vendit. “Ndonëse në kushte të vështira, prej politikave të brendshme e të jashtme të asaj kohe, kjo qeveri mori një sërë masash për ndërtimin e shtetit, për zhvillimin ekonomik e kulturor kombëtar, që do të hapnin rrugën e zhvillimit demokratik të vendit dhe të shtetit të ri, të pavarur shqiptar. Kjo qeveri mbrojti pranë Komisionit Ndërkombëtar të Kontrollit dhe pranë kancelarive të fuqive të mëdha të drejtat e ligjshme të popullit shqiptar dhe tërësinë territoriale të vendit”, – përfundoi deklaratën zonja Bregu.
